السلام عليكم ورحمة الله وبركاته
من المشكلات التي تواجهها المعلمة بالروضة، هي فارق التفكير بين المعلمة والطفل فلكل مرحلة خصائصها. وهالشي طبيعي.
شو رايكم خواتي في المنتدى، إنا نتناقش في الصعوبات التي تواجها المعلمة في التعامل مع طفل الروضة وإيجاد البدائل، للوصول إلى الحل الأمثل لكيفية التعامل مع طفل الروضة.
مثلا: مشكلة الشغب والحركة الزائدة والحوارات الجانبية…الخ. كيف ممكن نتعامل مع الطفل في هالحاله. نذكر كل مشكله ونشوف لها بدائل، يعني: بدال ما نقول له يا غبي ولا إنت ما شاطر وبعد ما منتبه نستبدلها بكلام آخر أو أسلوب ثاني…..الخ. بهالطريقة.
شاكرة لكم حسن تعاونكم معاي لصالح استفادة الجميع من الموضوع.
السلام عليكم
أوافقج أختي رعبوبة في هذا الموضوع.
أنا مش عارفة حل لمشكلة الشغب والحركة الزائدة والحوارات الجانبية.
أفيدوووووووووني جزاكم الله خيرا.
في دورة اسمها ( الانضباط الذكي في الفصول الدراسية) لمحمد السعدي من راك. أن حضرت الدورة، الصراحه علمنا استراتيجيات وااااااااااااايد رووووووووووووعه، أحاول أنفذها وإن شالله تنفع بس مفيده جدا. وإذا تبون تاخذون الدوره ممكن تتصلون فيه ويسوي لكم دوره بس أنا الحين ما عندي رقمه إذا تبونه بحاول أسأل لكم عنه.
لأني لو سردت لكم الدوره وااااااايد طويله لأن الدوره كانت 12 ساعه مقسمه على 3 أيام. بس إذا قدرت اختصرها بنزلها بالمنتدى. عشان يستفيد الكل بس بعد أريد ردود عشان الخبره بعد مهمه وتفيد.
في رأيى مشكلة الشغب مشكلة طبيعية والحركة أيضا… يعني عودي عمرج على انج ادرسين وتتعودين على حركتهم اقصد مب الحركة الزائدة عن حدها… لانهم أطفال وكثرة التنبيه تساعد مثلا اليوم الأول نبهتيهم الي بيليس بحطيله نجمة كذا وكذا .. واليوم الثاني لازم اتسوين نفس الشي اما اذا نسيتي مادري احس هم بروحهم ما بيثبت عندهم هالشي وكثرة التكرار يوميا لو مرة وحدة ااتكفي … انا عندي صغار اعاني من كثرة حركتهم صراحة مرات اتقبلهم لانهم أطفال ودوم اقوللهم خل اشوف منو الشاطر الي بيقعد ممم محمد قعد باجي منو الثاني منو الثالث يعني مشكلة تدريس الأطفال وايد يبالها تنبيه اهتمام وأهم شي صبر وطولة البال
اتمني اني أفدتكم… وشكر
مشكوره إختي عالإفادة، لأن كل معلومه طبعا مفيده ويجعلها في ميزان حسناتج يارب وهذا من حرصج على الأطفال.
أنا بعد مثلج أحاول أتقبل وصاروا يقعدوا زين بس يمكن بنت وولدين عندي يتحركون وايد بس شوية تنبيه ويقعدون، بس يردون مره ثانيه وهالشي طبيعي لأن الطفل مدة صبره 5 دقايق يدوب ويرجع مره ثانيه، المفروض إحنا اللي نصبر عليهم، بس المشكله يوم تحضر المديره كله تقول لي إنت ما عنج ضبط أو إدارتي الصفية مب أوكي، رغم إن الإداره اللي كانت قبلها والتوجيه اللي قبل كانوا يقولوا لي إدارتي زينه، عشان جي أدور حلول عشان أخلص منها المشكله.
حاولي اتعودين هاييل الأطفال على شي واحد جدام المديرة او من دونها عشان يقعدون حطي لسته أسامي واحذالها مربعات وقت ما تشرحين حطي ويه زعلان وقولي حق الطالب شوف لانك تتحرك وبعدين ودوري واحد يالس عدل وقوليله شوفو هذا يالس وكلهم بيسمعون صدقيني مع التكرار مش من أول مرة وسوي هذا أثناء الشرح ماعليه يمكن بتقطعين الدرس بس ما عليه مثل ما قلتي صبر… شوفي سوي حركة الي بيجمع 10 وجوه ضاحكة بسب السلوك الجيد تراها وايد حلوة هاذي الحركة وفي النهاية عطيه لعبة او في نفس الحصة قبل ما تبداين الدرس قولي ها خلوني اشوف منو يالس عدل عشان اعطيه قلم عطي كم واحد وبعدين ابداي الدرس وقولي انا بشوف منو بيتنبه للدرس وبيلس عشان يحصل هل القلم … في نهاية الدرس
اذا بالغلط واحد نش طبعا تستوي هل الأشياء .. حطيليه ويه زعلان وهكذا.. وايد كتبت ههههه اتمني فهمتو شي مني ..
مشكوره اختي على هالإقتراح.. أنا مسويه لهم لوحه تشجيعيه لكل الأطفال عندي في الصف عشان جي كلهم صاروا يقعدون زين بس هذيل باجين إن شالله مثلما قلتي شوية صبر وتكرار بيصيرون مثل الباجين.
ومشكوره على الاهتمام.
عفوا عزيزتي…..
جزاكم الله خير
احنا عندنا فترة الحركيه وهي حصة للرياضه
وفعلا الضبط عندي يكون صفر لان الطفل بمجرد يشوف الالعاب يتحمس وتصيييير عنده طاقه زاايده
ماعندكم حلول خواتي
انا اول شيء قبل لا أبدأ الحلقة أعيد ترتيب الأطفال بنت و ولد يعني افرق الأطفال الي يسولفون
وبعدين اذا صارت حركه اسوي لهم فاصل اعلاني ههههههه
يعني لعبة اصابع و نرجع للدرس أو أثني على الطفل الي جالس بأدب و احترام يعني نصفق أحسنت
تحياتي
رد طيب.. وأسلوب جميل.. وحل مفيد إن شاء الله
